मलकापूर : स्थानिक पद्मश्री डॉ. व्ही. बी. कोलते अभियांत्रिकी महाविद्यालय, मलकापूर येथे दिनांक १२ मार्च २०२६ रोजी स्थापत्य अभियांत्रिकी शाखेच्या विद्यार्थ्यांसाठी खुल्या कॅम्पस प्लेसमेंट ड्राइव्हचे यशस्वी आयोजन करण्यात आले. या कॅम्पस प्लेसमेंट ड्राइव्हचे आयोजन वेदर फायटर प्रायव्हेट लिमिटेड व हायबॉण्ड कोटिंग्स प्रायव्हेट लिमिटेड या कंपन्यांच्या सहकार्याने करण्यात आले.
सदर प्लेसमेंट ड्राइव्हमध्ये डिप्लोमा तसेच बी.ई. स्थापत्य अभियांत्रिकी (२०२३ ते २०२६ उत्तीर्ण) विद्यार्थ्यांना वॉटरप्रूफिंग, संरक्षक कोटिंग्ज तसेच बांधकाम प्रकल्प व्यवस्थापन या क्षेत्रात करिअर करण्याची संधी उपलब्ध करून देण्यात आली.
या प्लेसमेंट प्रक्रियेमध्ये एकूण ४१ विद्यार्थ्यांनी सहभाग नोंदविला. निवड प्रक्रियेमध्ये कागदपत्र पडताळणी, तांत्रिक मुलाखत तसेच मानव संसाधन विभागाची मुलाखत अशा विविध टप्प्यांचा समावेश होता. या मुलाखती संबंधित कंपनीच्या प्रतिनिधींकडून घेण्यात आल्या.
महाविद्यालयाचे प्राचार्य डॉ. अनिल खर्चे यांच्या मार्गदर्शनाखाली या प्लेसमेंट ड्राइव्हचे आयोजन करण्यात आले. या भरती प्रक्रियेसाठी एचआर व्यवस्थापक पायल कथोले यांनी कंपनीचे प्रतिनिधित्व केले.
या कॅम्पस प्लेसमेंट ड्राइव्हचे समन्वयक म्हणून प्रा. पांडुरंग व्ही. चोपडे व प्रा. पी. आर. पाटील यांनी कार्य केले. तसेच प्रा. ए. ए. मालोकार, प्रा. जी. एन. सुपे, प्रा. एस. डी. लवंगे व प्रा. पी. के. पाटील यांनी सक्रिय सहकार्य करून कार्यक्रमाचे यशस्वी नियोजन व विद्यार्थ्यांचे समन्वयन केले.
या उपक्रमाचे संस्थेच्या व्यवस्थापन व प्राध्यापकवर्गाने कौतुक केले. उद्योग व शैक्षणिक संस्थांमधील अशा प्रकारचे परस्पर सहकार्य ग्रामीण भागातील अभियांत्रिकी विद्यार्थ्यांना रोजगाराच्या उत्तम संधी उपलब्ध करून देण्यास तसेच त्यांना व्यावहारिक अनुभव मिळवून देण्यास महत्त्वाची भूमिका बजावते. या कॅम्पस प्लेसमेंट ड्राइव्हमुळे संस्थेची उद्योगांसोबतची भागीदारी अधिक दृढ होत असून विद्यार्थ्यांच्या रोजगारक्षमतेत वाढ होण्यास मदत होत असल्याचे मत व्यक्त करण्यात आले.
