बुलढाणा जिल्ह्यात कायद्याचा धाक कमी होत असल्याचे चित्र दिसून येत असून विविध अवैध धंदे उघडपणे सुरू असल्याची चर्चा नागरिकांमध्ये होत आहे. जिल्ह्यात वाळू तस्करी, गांजा विक्री, वरळी मटका तसेच एलपीजी गॅसची अवैध विक्री यांसारखे गैरकायदेशीर व्यवसाय सुरू असल्याचे समोर येत आहे. या पार्श्वभूमीवर अशा प्रकरणांची माहिती प्रसिद्ध करणाऱ्या पत्रकारांनाही धमकावले जात असल्याचे प्रकार समोर येत आहेत.
मिळालेल्या माहितीनुसार, काही माफिया गटांच्या अवैध धंद्यांविषयी वृत्त प्रकाशित होणार असल्याचे समजताच संबंधित पत्रकारांना थेट धमक्या दिल्या जात असल्याचा आरोप करण्यात येत आहे. काही प्रकरणांमध्ये पत्रकारांच्या घरावर गांजा टाकून त्यांना अडकवण्याची तसेच नारकोटिक कायद्यांतर्गत गुन्हा दाखल करण्याची धमकी दिली जात असल्याची माहिती पुढे येत आहे.
तसेच काही अवैध धंदे करणारे व्यक्ती स्वतःला प्रभावशाली असल्याचे सांगत पोलिसांची भीती नसल्याचेही बोलून दाखवत असल्याचे सांगितले जात आहे. या पार्श्वभूमीवर जिल्ह्यात वाढत असलेल्या अवैध व्यवसायांवर कठोर कारवाई करावी तसेच पत्रकारांच्या सुरक्षिततेसाठी ठोस पावले उचलावीत, अशी मागणी नागरिकांकडून व्यक्त होत आहे.
