मलकापूर शहरातील ईदगाह प्लॉट परिसरातील प्रभाग क्रमांक ९ मध्ये जावेद ठेकेदार यांच्या घराजवळील नाल्यांची अवस्था अत्यंत दयनीय झाली आहे. नाल्यांची नियमित स्वच्छता न झाल्यामुळे सांडपाणी तुंबून रस्त्यावरून वाहत असून, परिसरातील नागरिकांचे दैनंदिन जीवन विस्कळीत झाले आहे. स्थानिक रहिवाशांनी पाठवलेल्या व्हिडीओतून ही समस्या स्पष्टपणे समोर आली असून, नाल्यांत साचलेला कचरा व घाण पाण्याचा मोकळा प्रवाह दिसून येत आहे.
या भागात नाल्यांची वेळेवर स्वच्छता न केल्यामुळे दुर्गंधी पसरली असून, डास व कीटकांचा प्रादुर्भाव वाढत आहे. परिणामी संसर्गजन्य आजारांचा धोका निर्माण झाला असून, नागरिकांच्या आरोग्याशी थेट खेळ सुरू आहे. पावसाळ्याच्या पार्श्वभूमीवर ही परिस्थिती अधिक गंभीर होण्याची शक्यता नाकारता येत नाही.
स्थानिक नागरिकांनी याबाबत वारंवार तक्रारी करूनही मलकापूर नगरपालिकेकडून ठोस कार्यवाही होत नसल्याचा आरोप केला जात आहे. नाल्यांची स्वच्छता, दुरुस्ती व सांडपाणी व्यवस्थापनाबाबत प्रशासनाची उदासीनता स्पष्टपणे दिसून येत आहे. नागरिकांचा सवाल आहे की, एखादी मोठी दुर्घटना किंवा साथीचा आजार पसरल्यानंतरच प्रशासन जागे होणार का.
या गंभीर समस्येकडे मलकापूर नगरपालिकेने तातडीने लक्ष देऊन नाल्यांची संपूर्ण स्वच्छता करावी तसेच कायमस्वरूपी उपाययोजना राबवाव्यात, अशी जोरदार मागणी परिसरातील रहिवाशांकडून होत आहे. आता नगरपालिकेची पुढील भूमिका काय असते, याकडे संपूर्ण शहराचे लक्ष लागले आहे.
