पद्मश्री डॉ. व्ही. बी. कोलते कॉलेज ऑफ इंजिनिअरिंग, मलकापूर येथे ओपन कॅम्पस प्लेसमेंट ड्राइव्ह यशस्वी
मलकापूर येथील पद्मश्री. डॉ. व्ही. बी. कोलते कॉलेज ऑफ इंजिनिअरिंग येथे नेक्सानोव्हा प्रोटेक प्रा. लि., पुणे यांच्यासाठी ओपन कॅम्पस प्लेसमेंट ड्राइव्ह यशस्वीपणे आयोजित करण्यात आली. या उपक्रमास महाराष्ट्रभरातून विद्यार्थ्यांचा उत्स्फूर्त प्रतिसाद लाभला. जळगाव, पुणे, अकोला, शेगाव, अमरावती, बुलढाणा व नागपूर येथील विद्यार्थ्यांनी भरती प्रक्रियेत सहभाग नोंदविला.
या प्लेसमेंट ड्राइव्हसाठी एकूण १६४ विद्यार्थी उपस्थित होते. निवड प्रक्रियेच्या पहिल्या टप्प्यात तांत्रिक अभियोग्यता चाचणी (टेक्निकल अप्टिट्यूड टेस्ट) घेण्यात आली. या चाचणीनंतर ४५ विद्यार्थ्यांची दुसऱ्या टप्प्यासाठी, म्हणजेच कोडिंग टेस्टसाठी निवड करण्यात आली. या फेरीत विद्यार्थ्यांच्या प्रोग्रामिंग कौशल्यांचा व तर्कशक्तीचा आढावा घेण्यात आला.
ही प्लेसमेंट ड्राइव्ह प्रशिक्षण व प्लेसमेंट अधिकारी प्रा. पांडुरंग चोपडे यांच्या मार्गदर्शनाखाली यशस्वीरीत्या पार पडली. कार्यक्रमाचे सूत्रसंचालन प्रा. अमोल तांबे यांनी केले.
या प्रसंगी महाविद्यालयाचे प्राचार्य डॉ. अनिल खर्चे, प्रशासकीय डीन डॉ. युगेश खर्चे, आय क्यू ए सी अधिकारी प्रा. रमाकांत चौधरी, संगणक अभियांत्रिकी विभागप्रमुख प्रा. सुदेश फरफट, डॉ. मंजिरी करांडे, प्रा. एम. आर. चौधरी, प्रा. अंकुश नरखेडे व प्रा. प्रतीक पाटील यांची प्रमुख उपस्थिती होती.
विद्यार्थ्यांना मार्गदर्शन करताना प्राचार्य डॉ. खर्चे यांनी तांत्रिक ज्ञानासोबतच संवाद कौशल्ये व व्यावसायिक नैतिकता विकसित करण्याचे महत्त्व अधोरेखित केले. यावेळी कंपनीच्या एचआर प्रतिनिधी सौ. स्वप्नाली लाटकर यांनी प्री-प्लेसमेंट टॉकद्वारे कंपनीची माहिती, उपलब्ध पदे, करिअरच्या संधी व मुलाखत प्रक्रियेबाबत सविस्तर मार्गदर्शन केले.
ही ओपन कॅम्पस प्लेसमेंट ड्राइव्ह यशस्वीपणे पार पडल्याने महाविद्यालयाच्या उद्योग–शैक्षणिक सहकार्याबाबतची बांधिलकी अधोरेखित झाली आहे. नेक्सानोव्हा प्रोटेक प्रा. लि., पुणे यांचे महाविद्यालयातर्फे आभार मानण्यात आले तसेच महाराष्ट्राच्या विविध भागांतून सहभागी झालेल्या सर्व विद्यार्थ्यांचे अभिनंदन करण्यात आले.
